Narayaneeyam Dasakam - 6
nārāyaṇīyaṁ ṣaṣṭhadaśakam (6) – virāṭ-svarūpavarṇanam
ēvaṁ caturdaśajaganmayatāṁ gatasya
pātālamīśa tava pādatalaṁ vadanti |
pādōrdhvadēśamapi dēva rasātalaṁ tē
gulphadvayaṁ khalu mahātalamadbhutātman || 6-1 ||
jaṅghē talātalamathō sutalaṁ ca jānū
kiñcōrubhāgayugalaṁ vitalātalē dvē |
kṣōṇītalaṁ jaghanamaṁbaramaṅga nābhi
rvakṣaśca śakranilayastava cakrapāṇē || 6-2 ||
grīvā mahastava mukhaṁ ca janastapastu
phālaṁ śirastava samastamayasya satyam |
ēvaṁ jaganmayatanō jagadāśritaira-
pyanyairnibaddhavapuṣē bhagavannamastē || 6-3 ||
tvadbrahmarandhrapadamīśvara viśvakanda
chandāṁsi kēśava ghanāstava kēśapāśāḥ |
ullāsicilliyugalaṁ druhiṇasya gēhaṁ
pakṣmāṇi rātridivasau savitā ca nētrē || 6-4 ||
niśśēṣaviśvaracanā ca kaṭākṣamōkṣaḥ
karṇau diśō:’śviyugalaṁ tava nāsikē dvē |
lōbhatrapē ca bhagavannadharōttarōṣṭhau
tārāgaṇāśca daśanāḥ śamanaśca daṁṣṭrā || 6-5 ||
māyā vilāsahasitaṁ śvasitaṁ samīrō
jihvā jalaṁ vacanamīśa śakuntapaṅktiḥ |
siddhādayaḥ svaragaṇā mukharandhramagni-
rdēvā bhujāḥ stanayugaṁ tava dharmadēvaḥ || 6-6 ||
pr̥ṣṭhaṁ tvadharma iha dēva manaḥ sudhāṁśu-
ravyaktamēva hr̥dayāṁbujamaṁbujākṣa |
kukṣiḥ samudranivahā vasanaṁ tu sandhyē
śēphaḥ prajāpatirasau vr̥ṣaṇau ca mitraḥ || 6-7 ||
śrōṇīsthalaṁ mr̥gagaṇāḥ padayōrnakhāstē
hastyuṣṭrasaindhavamukhā gamanaṁ tu kālaḥ |
viprādivarṇabhavanaṁ vadanābjabāhu-
cārūruyugmacaraṇaṁ karuṇāṁbudhē tē || 6-8 ||
saṁsāracakramayi cakradhara kriyāstē
vīryaṁ mahāsuragaṇō:’sthikulāni śailāḥ |
nāḍyassaritsamudayastaravaśca rōma
jīyādidaṁ vapuranirvacanīyamīśa || 6-9 ||
īdr̥gjaganmayavapustava karmabhājāṁ
karmāvasānasamayē smaraṇīyamāhuḥ |
tasyāntarātmavapuṣē vimalātmanē tē
vātālayādhipa namō:’stu nirundhi rōgān || 6-10 ||
iti ṣaṣṭhadaśakaṁ samāptam ||
